ബെംഗളൂരു: റെസിഡൻഷ്യൽ മേഖലയിൽ ഹോംസ്റ്റേയും കഫേയും അടങ്ങുന്ന വാണിജ്യ സ്ഥാപനം ആരംഭിക്കാനുള്ള നീക്കത്തിനെതിരെ എച്ച്.ആർ.ബി.ആർ ലേഔട്ടിലെ (HRBR Layout) താമസക്കാർ പ്രതിഷേധവുമായി രംഗത്ത്. ശബ്ദമലിനീകരണം, ഗതാഗതക്കുരുക്ക്, പാർക്കിങ് പ്രതിസന്ധി, പരിസ്ഥിതി പ്രശ്നങ്ങൾ എന്നിവ ചൂണ്ടിക്കാട്ടിയാണ് പ്രദേശവാസികൾ എതിർപ്പുമായി തെരുവിലിറങ്ങിയത്. ‘ബ്ലോസംലി ഹൗസ്’ (Blossomly House) എന്ന പേരിൽ ആരംഭിക്കാനിരിക്കുന്ന സംരംഭത്തിനെതിരെ അഞ്ചാം എ മെയിൻ റോഡിലെ മുതിർന്ന പൗരന്മാരും യുവാക്കളും ഉൾപ്പെടെയുള്ളവർ ബാനറുകളും പ്ലക്കാർഡുകളുയർത്തി പ്രതിഷേധ മാർച്ച് നടത്തി.
സമാധാന അന്തരീക്ഷം തകരുമെന്ന് പ്രദേശവാസികൾ
ശാന്തമായ റെസിഡൻഷ്യൽ മേഖലയിലേക്ക് വാണിജ്യ സ്ഥാപനങ്ങൾ കടന്നുവരുന്നത് പ്രദേശവാസികളുടെ സ്വകാര്യതയെയും സമാധാനത്തെയും ബാധിക്കുമെന്ന് സമരക്കാർ ചൂണ്ടിക്കാട്ടി. കെട്ടിടത്തോടു ചേർന്ന് വാണിജ്യ ആവശ്യത്തിനായുള്ള വലിയ എക്‌സ്‌ഹോസ്റ്റ് സിസ്റ്റം സ്ഥാപിക്കുന്നത് പുകയും ദുർഗന്ധവും കടുത്ത ശബ്ദമലിനീകരണവും ഉണ്ടാക്കുമെന്നും ഇത് ആരോഗ്യപ്രശ്നങ്ങളിലേക്ക് നയിക്കുമെന്നും അവർ ആരോപിക്കുന്നു. സമീപത്തെ രാജഖാലുവെ (പ്രധാന അഴുക്കുചാൽ) ആക്രമിച്ച് നിർമാണം നടത്തുന്നതായും പ്രദേശവാസികൾ പരാതിപ്പെട്ടു.
ദിവസേന നിരവധിയാളുകൾ വന്നുപോകുന്നത് മേഖലയിൽ അനാവശ്യമായ ബഹളത്തിനും സുരക്ഷാ ഭീഷണിക്കും കാരണമാകുമെന്ന് പ്രദേശവാസിയായ കെ.ആർ. പ്രഭാകർ പറഞ്ഞു. മേഖലയിലെ പ്രധാന റോഡുകളിൽ നിലവിൽത്തന്നെ വാഹന പാർക്കിങ് പ്രതിസന്ധിയുണ്ട്. പുതിയ കഫേ കൂടി വരുന്നതോടെ തങ്ങളുടെ വീടുകൾക്ക് മുന്നിൽ പോലും വാഹനം നിർത്താൻ കഴിയാത്ത അവസ്ഥയാകുമെന്ന് 35 വർഷമായി ഇവിടെ താമസിക്കുന്ന ഗോമതി വെങ്കടേശൻ പറഞ്ഞു. വിഷയം ഉന്നയിച്ചപ്പോൾ ഈ റോഡ് വൈകാതെ ഒരു വാണിജ്യ കേന്ദ്രമായി മാറുമെന്നും വേണമെങ്കിൽ ഇവിടെനിന്ന് മാറിക്കോളൂ എന്നുമുള്ള മറുപടിയാണ് കെട്ടിട ഉടമ നൽകിയതെന്നും അവർ ആരോപിച്ചു.
അനുമതികളിൽ വ്യക്തത തേടി കോർപ്പറേഷന് പരാതി
നിർദിഷ്ട സ്ഥാപനത്തിന് ആവശ്യമായ എല്ലാ നിയമപരമായ അനുമതികളും ലഭിച്ചിട്ടുണ്ടോ എന്ന് വ്യക്തമാക്കണമെന്ന് ആവശ്യപ്പെട്ട് പ്രദേശവാസികൾ ബെംഗളൂരു നോർത്ത് സിറ്റി കോർപ്പറേഷന് (BNCC) പരാതി നൽകിയിട്ടുണ്ട്. സോണിങ് നിയമങ്ങൾ, ഭൂവിനിയോഗ അനുമതി, രാജഖാലുവെ എൻ.ഒ.സി എന്നിവ പരിശോധിക്കണമെന്നാണ് ഇവരുടെ ആവശ്യം. പ്രദേശം പൂർണ്ണമായും റെസിഡൻഷ്യൽ ആണെന്നും യാതൊരു കാരണവശാലും ഇവിടെ വാണിജ്യ പ്രവർത്തനങ്ങൾ അനുവദിക്കില്ലെന്നും ബെംഗളൂരു മഹാനഗര പാലികെയിലെ (BBMP) മുൻ പ്രതിപക്ഷ നേതാവും വ്യക്തമാക്കി.
ജെൻ-സിക്കായുള്ള വേറിട്ട സംരംഭമെന്ന് ഉടമ
അതേസമയം, പ്രദേശവാസികൾക്ക് ബുദ്ധിമുട്ടുണ്ടാക്കുന്ന രീതിയിലുള്ള വാണിജ്യ കേന്ദ്രമല്ല ഇതെന്നും പുതിയ തലമുറയ്ക്ക് (Gen-Z) വേണ്ടിയാണ് ഇത് വിഭാവനം ചെയ്തതെന്നും കെട്ടിട ഉടമ സച്ചിൻ ജെയിൻ പ്രതികരിച്ചു. ഈ കേന്ദ്രം പൂർണ്ണമായും പുകവലി നിരോധിത മേഖലയായിരിക്കും. ചെറുപ്പക്കാർക്ക് വന്ന് പുസ്തകം വായിക്കാനും സമയം ചെലവഴിക്കാനും പാകത്തിൽ ഒരു ലൈബ്രറി കൂടി ഇതിനുള്ളിൽ സജ്ജീകരിക്കും. അയൽക്കാർക്ക് പ്രയാസമില്ലാത്ത രീതിയിലാകും കേന്ദ്രത്തിന്റെ പ്രവർത്തനമെന്നും അദ്ദേഹം കൂട്ടിച്ചേർത്തു.
ബെംഗളൂരുവാർത്തയുടെ ആൻഡ്രോയ്ഡ് ആപ്ലിക്കേഷൻ ഇപ്പോൾ ഗൂഗിൾ പ്ലേസ്റ്റോറിൽ ലഭ്യമാണ്, പോർട്ടലിൽ പ്രസിദ്ധീകരിക്കുന്ന വാർത്തകൾ വേഗത്തിൽ അറിയാൻ മൊബൈൽ ആപ്പ് ഇൻസ്റ്റാൾ ചെയ്യുക. If you cannot read Malayalam,Download BengaluruVartha Android app from Google play store and Click On the News Reader Button. [masterslider id="10"]
